ТОШКЕНТ, 31 мар – Sputnik. Евроосиё иқтисодий иттифоқи (ЕОИИ) ва Бангладеш савдо-иқтисодий ҳамкорликнинг устувор масалаларини муҳокама қилди.
Евроосиё иқтисодий комиссиясининг (ЕИК) интеграция ва макроиқтисодиёт бўйича вазири Элдар Алишеров Бангладеш савдо вазири ўринбосари Аиша Актер билан учрашувда ўзаро товар айирбошлаш ҳажми ошиб бораётганини таъкидлади. ЕОИИ мамлакатлари Бангладешга қишлоқ хўжалиги маҳсулотлари, энергия ресурслари, металл, машина ва асбоб-ускуналар экспорт қилмоқда, Бангладешдан эса текстиль, кийим-кечак ва пойабзал харид қилмоқда.
“Томонларнинг бир-бирларининг савдо-иқтисодий имкониятлари тўғрисида хабардорлигини ошириш ва ўзаро ҳамкорликни кенгайтириш учун янги истиқболли йўналишларни излаш муҳим вазифадир”, - деди Алишеров.
Ўз навбатида, Аиша Актер томонлар савдо-иқтисодий ҳамкорлик салоҳиятини сифатли очиб бериш учун имконият ва ресурсларга эга эканлигига эътибор қаратди. Бангладеш ЕИК ва ЕОИИ мамлакатлари билан ўзаро муносабатларнинг узоқ муддатли хусусиятини қадрлайди. Мамлакат иттифоқ тадбиркорларига мавжуд имкониятлардан тўлиқ фойдаланишни таклиф қилади.
Томонлар Бангладешга озиқ-овқат донларини етказиб беришни кенгайтиришни батафсил муҳокама қилишди, меҳнат миграциясини ташкил этиш бўйича маълумотлар ва савдо тартиб-таомилларини соддалаштириш бўйича таклифлар билан алмашишди.
Бангладеш ЕОИИ ва мамлакат ўртасида эркин савдо зонасини яратиш масалада ўз қизиқишини тасдиқлади.
ЕИК ва Бангладеш ҳукумати ўртасида ҳамкорлик меморандуми 2019 йил 31 майда Москвада имзоланган.