ТОШКЕНТ, 21 фев — Sputnik. Ўзбекистон Россиянинг Петропавловск-Камчатский шаҳридан туристлар оқимини ошириш бўйича келишувга эришди. Бу ҳақда “Дунё” АА хабар берди.
Ўзбекистоннинг Владивосток шаҳридаги Бош консулхонаси дипломатлари Петропавловск-Камчатский шаҳрида ўтказилган туризмни барқарор ривожлантириш бўйича V “Путешествуй!” (“Саёҳат қил!”) форумида иштирок этишди.
Ўзбекистон вакиллари “Discover Russia: Россияни Узоқ Шарқдан кашф қилиш” мавзусидаги асосий сессияда Ўзбекистоннинг сайёҳлик салоҳиятига доир тақдимот ўтказдилар. Иштирокчиларга мамлакатда туризм йўналишида амалга оширилаётган ислоҳотлар ва соҳани қўллаб-қувватлашга қаратилган қарор ва дастурлар ҳақида сўзлаб берилди. Шу билан бирга, Ўзбекистоннинг экологик, маданий, зиёрат, гастрономик ва саноат туризми имкониятлари, Тошкент, Бухоро, Самарқанд, Хива ва Термиз каби тарихий шаҳарлар салоҳияти ҳақида таъкидланди.
Ўзбекистоннинг бой маданий мероси, тарихий шаҳарлари ва зиёратгоҳлари, хорижлик сайёҳлар учун яратилган қулай шароитлар россиялик туроператорларда катта қизиқиш уйғотди. Шунингдек, форумда туризм ва меҳмондўстлик саноатини ривожлантириш, Россия ва хорижий давлатлар сайёҳлик ташкилотлари ўртасида экологик ва қишки туризмни ривожлантириш бўйича кўп тармоқли тажриба алмашиш ҳамда соҳа ҳамжамиятини ўйлантираётган энг долзарб масалалар муҳокама қилинди.
Ўзбекистон томони Петропавловск-Камчатский шаҳридаги етакчи туркомпаниялар билан Ўзбекистон сайёҳлик салоҳиятини тарғиб қилиш ва Россиянинг ушбу ҳудудидан туристлар оқимини ошириш бўйича келишувга эришди.