TOШКЕНТ, 27 ноя — Sputnik. Келаси йил Самарқандда миграция масалалари бўйича Приморск ўлкаси ваколатхонаси очилиши кутилмоқда. Бу ҳақда Ўзбекистон ташқи ишлар вазири ўринбосари Олимжон Абдуллаев ва Приморск ўлкаси губернатори Олег Кожемяко ўртасида бўлиб ўтган учрашувда маълум қилинди, деб ёзмоқда "Дунё" АА.
Айтилишича, томонлар Приморск ўлкаси губернаторининг Ўзбекистонга ташрифи чоғида Ўзбекистон ва Приморск ўлкаси ўртасидаги ҳудудлараро ҳамкорликни янада кенгайтириш истиқболларини муҳокама қилишган.
“Учрашувда 2025 йилда Самарқандда миграция масалалари бўйича Приморск ўлкаси ваколатхонасини очиш масалалари муҳокама қилинди. Приморск ўлкасида миграция сиёсатини юмшатишга қаратилган келишувларга эришилди”, — дейилади хабарда.
Шунингдек, Ўзбекистондан меҳнат мигрантларини жалб қилиш масалаларига алоҳида эътибор қаратилди.
“Бу борадаги ўзаро ҳамкорликни тизимлаштириш учун Приморск ўлкаси ҳукумати таркибида Ўзбекистон фуқароларини танлаш ва ишга жойлаштириш жараёнини назорат қилувчи, уларнинг меҳнат ҳуқуқларини ҳимоя қиладиган ва янги шароитларга мослашувчи махсус бўлим ташкил этиш режалаштирилмоқда”, — дея қайд этилган хабарда.
Олег Кожемяко Иккинчи жаҳон уруши йилларида Ўзбекистон қўшган ҳиссасини юқори баҳолаб, минглаб рус ва бошқа миллат болаларини қабул қилган ўзбек халқининг қаҳрамонлигини алоҳида таъкидлади. У Приморск ўлкаси Ўзбекистон билан ҳамкорликни чуқурлаштиришдан манфаатдор эканини алоҳида қайд этди.