ТОШКЕНТ, 28 окт — Sputnik. Ўзбекистон парламентининг қонунчилик палатасига сайловлар фуқароларнинг ўз хоҳиш-иродасини эркин ифода этишини таъминлаган ҳолда рақобат асосида ўтказилди. Бу ҳақда МДҲ бош котиби, Ҳамдўстлик мамлакатлари кузатувчилари миссияси раҳбари Сергей Лебедев брифингда маълум қилди.
МДҲ бош котиби сайловлар Ўзбекистон Конституцияси ва Сайлов кодекси талабларига тўлиқ мос ҳолда ўтганини, республика фуқароларининг ўз хоҳиш-иродасини эркин ифода этиши таъминланганини таъкидлади. Лебедев республикада сайловлар давомида халқаро кузатувчиларнинг ишлаши учун барча зарур шароитлар яратилганини ҳам қайд этди.
МДҲ ПА халқаро кузатувчилар гуруҳи координатори, Қирғизистон Жогорку Кенеши депутати Талайбек Масабировнинг сўзларига кўра, сайловлар рақобатли муҳитида ўтди, Ўзбекистон фуқаролари турли сиёсий дастурлардан бирини танлашда реал имкониятларга эга бўлишди.
"Сайловлар сайлов жараёнининг барча иштирокчиларининг ҳуқуқ ва эркинликларига риоя қилинган ҳолда ўтказилди", — деди Масабиров.
Шанхай ҳамкорлик ташкилоти (ШҲТ) бош котиби ўринбосари Нурлан Ермекбаев брифингда маълум қилишича, сайловлар қонунчиликка мувофиқ, қонунбузарликларсиз, демократик бўлиб ўтди.
“Шанхай ҳамкорлик ташкилотининг кузатувчилар миссияси Ўзбекистон парламенти Қонунчилик палатасига сайлов эркин, демократик ва миллий қонунчилик талабларига жавоб берадиган тарзда ўтди, деб ҳисоблайди. Мазкур сайловларда овоз бериш натижаларини шубҳа остига қўядиган қонунбузарликлар аниқланмади”, — деди Ермекбаев брифингда.
Эслатиб ўтамиз, 27 октябрь куни Ўзбекистон Олий Мажлиси Қонунчилик палатаси ва маҳаллий Кенгашлар депутатлари сайлови бўлиб ўтди. Унда 15 027 529 нафар сайловчи овоз берди. Хорижда овоз берганлар сони 140 388 нафарга тенг бўлди.