TOШКЕНТ, 9 окт — Sputnik. Россия Федерацияси президенти Владимир Путин МДҲ бош котиби ўринбосари Илҳом Неъматовни “Дўстлик” ордени билан тақдирлади. Бу ҳақда МДҲ Ижроия қўмитаси матбуот хизмати маълум қилди.
Мукофот Россия президенти Владимир Путин томонидан Москвада бўлиб ўтган МДҲ Давлат раҳбарлари кенгашининг йиғилишида топширилди.
Президент Республики Узбекистан принял участие в саммите СНГ
© Пресс-служба президента Узбекистана
“МДҲ давлатлари ўртасидаги дўстона муносабатларни мустаҳкамлаш ва ривожлантиришга қўшган улкан ҳиссаси учун Илҳом Неъматов “Дўстлик” ордени билан тақдирланди”, — дейилади хабарда.
Эслатиб ўтамиз, Илҳом Неъматов 2021 йил январидан бери МДҲ бош котиби ўринбосари лавозимида ишлаб келаётган эди.
Бу лавозимда у МДҲ Ижроия қўмитаси ва МДҲга аъзо давлатларнинг МДҲ Иқтисодий кенгаши ҳузуридаги Иқтисодий масалалар бўйича комиссиядаги ваколатли вакиллари ўртасидаги ўзаро ҳамкорликни ташкил этиш бўйича назоратни амалга оширади.
Мустақил Давлатлар Ҳамдўстлиги Давлат раҳбарлари кенгаши, Ҳукумат раҳбарлари кенгаши, Ташқи ишлар вазирлари кенгаши ва Иқтисодий кенгашининг иқтисодий ҳамкорлик масалалари бўйича мажлисларига тайёргарлик кўришни мувофиқлаштиради, халқаро ташкилотлар билан ҳамкорлик қилиш, уларнинг бўлинмалари ва институтлари билан иқтисодий ва ҳуқуқий (иқтисодий ҳамкорликни ҳуқуқий таъминлаш) масалалари бўйича муносабатларни ривожлантириш учун масъулдир.
Соҳавий ҳамкорлик органлари билан ўзаро ҳамкорликни мувофиқлаштиради, халқаро ташкилотлар билан ҳамкорлик қилади.
Илҳом Неъматов МДҲ Ижроия қўмитасига тайинлангунга қадар Ўзбекистон Ташқи ишлар вазирлигида ишлаган. Турли вақтларда Ҳиндистон, Россия Федерацияси, АҚШ, Бразилия ва Канададаги дипломатик ваколатхоналарни бошқарган. Ўзбекистон Ташқи ишлар вазирининг ўринбосари ва биринчи ўринбосари бўлган. Ўзбекистон Республикасининг Фавқулодда ва Мухтор Элчиси дипломатик унвонига эга.