ТОШКЕНТ, 23 сен — Sputnik. Туркия ШҲТ, БРИКС ва АСЕАН билан ҳамкорликни мустаҳкамлаш ниятида ва бу борада муҳим қадамлар ташлади. Бу ҳақда Туркия президенти Режеп Таййип Эрдоған маълум қилди, деб ёзмоқда РИА Новости.
Россия Федерацияси президентининг ёрдамчиси Юрий Ушаков аввалроқ Туркия БРИКСга тўлақонли аъзолик учун ариза топширгани, у кўриб чиқилиши ҳақида хабар берган эди. Унга кўра, Туркия президенти 22-24 октябрь кунлари Қозон шаҳрида бўлиб ўтадиган БРИКС саммитига таклифни қабул қилган.
“Ғарб дунёси билан ҳамкорликни ривожлантирар эканмиз, биз Шарқни эътибордан четда қолдирмаймиз, Шанхай ҳамкорлик ташкилоти (ШҲТ), БРИКС ва АСЕАН билан мулоқотимизни кучайтириш ниятидамиз. Яқинда бу борада муҳим қадамлар қўйдик. Биз бутунлай бошқача иқлимга эришдик. Туркияга эътибор қаратган ва мамлакатимиз манфаатларини биринчи ўринга қўйган ҳолда турли минтақавий ташкилотлар билан ҳамкорлигимизни янада ривожлантирамиз”, — дея иқтибос келтирди "Anadolu" агентлиги АҚШда бўлиб турган Туркия раҳбарининг сўзларидан.