ТОШКЕНТ, 18 сен — Sputnik. Бу йил пахта йиғим-терим ишларида республика бўйича жами 1 690 дона, шундан 609 дона 2024 йилда янги лизинг асосида харид қилинадиган пахта териш машиналари қатнашиши режалаштирилган. Бу ҳақда "Ўзагроинспекция" ахборот хизмати маълум қилди.
“Пахта териш машиналарининг 1 423 донаси ёки 84 фоизи юқори унумли техникалар ҳисобланади. Айниқса пахта майдони машина терими учун агротехник талаблар даражасида тўғри тайёрланган бўлса, ушбу янги авлод пахта териш машинасининг ҳар бирини иш унумдорлиги кунига 50 тоннагача бўлиб, 800-1000 нафар теримчи ўрнини боса олади”, — дейилади хабарда.
Бу йил илк бор имтиёзли лизинг шартлари асосида 600 тадан ортиқ юқори унумли пахта териш машиналарини жойлардаги фермер хўжаликлари ва кластерларга етказиб берилиши кутилмоқда.
Айтилишича, пахта териш машиналари ёрдамида теримни янада қўллаб-қувватлаш мақсадида барча ҳудудларда пахта териш машиналари томонидан терилган ҳар бир тонна пахта хомашёсини йиғиб-териб олиш хизмати баҳосини 20 фоизи, бироқ 250 минг сўмдан ошмаган қисми Жамғарма маблағлари ҳисобидан қопланади.
“Берилаётган ушбу имтиёз ва имкониятлар натижасида бугунги кунда республиканинг барча ҳудудларида пахта териш машиналари терими бошлаб юборилди”, — дея қайд этилган хабарда.
Мавсумда қатнашадиган машиналарнинг асосий қисми қуйидаги ҳудудларга тўғри келмоқда:
Жиззахда 406 дона;
Қашқадарёда 281 дона;
Сирдарёда 201 дона;
Тошкентда 184 дона;
Наманганда 108 дона.
Эслатиб ўтамиз, аввалроқ Ўзбекистонга нисбатан “пахта бойкоти” бекор қилинди. Бу борада “Cotton Capaign” халқаро коалицияси билан ҳамкорлик давом эттирилмоқда. Шу билан бирга, барқарор қонунчилик базаси яратилгани, инвестициявий муҳит яхшилангани, янги технологиялар жорий этилгани натижасида пахта толасини қайта ишлаш 2017 йилдаги 40 фоиздан 100 фоизга етди. Айни вақтда четдан тола ва хомашё олиб келиб, юқори қўшилган қийматли тайёр маҳсулотлар ишлаб чиқариш борасидаги ишлар ҳам бошланди.