ТОШКЕНТ, 15 май — Sputnik. Заргарлик учун қимматбаҳо тошларни олиб кириш солиқдан озод қилинди. Бу ҳақда президент қарорига киритилган қўшимча ва ўзгартиришларда назарда тутилган.
Президент томонидан имзоланган Қонун (ЎРҚ-926-сон, 13.05.2024 й.) билан айрим қонун ҳужжатларига қўшимча ва ўзгартиришлар киритилди.
Солиқ кодексига киритилган ўзгартириш
“Заргарлик буюмларини ишлаб чиқариш учун фойдаланиладиган қимматбаҳо тошларни Ўзбекистон ҳудудига олиб кириш қўшилган қиймат солиғидан 2024 йил 1 январдан 2027 йил 1 январгача озод қилинади”, — дейилади ҳужжат матнида.
Шунингдек, Касаба уюшмалари тизимидаги болалар соғломлаштириш оромгоҳлари негизида болаларнинг дам олиш мавсумидан ташқари даврда ташкил этиладиган дам олиш уйларининг ва дам олиш зоналарининг мазкур йўналишдаги хизматларни кўрсатишдан олган фойдаси 2026 йил 1 январгача фойда солиғидан озод қилинади.
“Туризм тўғрисида”ги қонунига киритилган ўзгартириш
Касаба уюшмалари тизимидаги болалар соғломлаштириш оромгоҳлари негизида болаларнинг дам олиш мавсумидан ташқари даврда ташкил этиладиган дам олиш уйлари ва дам олиш зоналари жойлаштириш воситалари сифатида мажбурий сертификатлаштиришдан озод этилади.
Қонун расмий эълон қилинган кундан эътиборан кучга киради.
Маълумот учун, Ўзбекистонда йилига 100 тонна олтин қазиб олинмоқда. Уни заргар тадбиркорларга бўлиб тўлаш шарти билан сотишга рухсат берилган.