ТОШКЕНТ, 21 ноя — Sputnik. Тошкент “иссиқлик оролига” айланмоқда. Бу ҳақида иқлимшунос эксперт Эркин Абдулаҳатов Sputnik Ўзбекистон мухбири билан суҳбатда маълум қилди.
Биламиз, баҳорда кўп ёмғир ёғади, ерлар доим нам бўлади, асфальт қизимайди. Шуни ҳисобига баҳор ва ёз ойлари бошларида Тошкент шаҳри бир муддат энг тоза ҳудуд мақомини олади. Ёз ўрталаригача ҳаво исийди.
"Ундан ташқари, пойтахтда яшиллик даражаси ҳам кескин камайиб кетган. Бундан 15 йил илгари шаҳар 20-30 фоизгача яшиллилик билан қопланган бўлса, ҳозир ушбу кўрсаткич 10-18 фоизга тушиб қолган. Дарахтлар, боғлар ва кўкламзорлар ўрнига шаҳар бинолар, йўллар, асфальт ва бетон билан қопланган, шаҳарсозлик ва қурилишлар ҳам фаол олиб борилмоқда", — деди Абдулаҳатов.
Оқибатда ҳавонинг юқори иссиқлиги, асфальт қопламаларига, яшиллик билан ҳимояланмаган тупроқ қатламларига сингиб, ундаги намгарчилик даражаси янада камайтириб юборади. Сўнгги вақтларда ушбу ҳодисани ифодаловчи Тошкент “иссиқлик ороли” деган тушунча ҳам пайдо бўлган.
"Юқори иссиқлик оқибатида тупроқдан майда чанг заррачалари ҳавога кўтарилади. Бу жараён ёз-куз ойларида сўнгги 3-4 йилликда одатий бўлиб қолди. Ёмғирсиз мавсумларда шаҳар ҳавосида майда диспер заррачалар миқдори кескин ортмоқда. Баъзан шамол бўлмаган ҳолатда ҳам биз “рейтингда” 5,6-ўринларга чиқиб оляпмиз", — дея қайд этди у.
Прогнозларга кўра, эндиликда ҳарорат юқорилаб бораверади, шаҳар кенгаяверади, натижада чанг заррачалари ортишига гувоҳ бўламиз.
"Агар биз яшил иқтисодиёт тамойиллари асосида ўз ишларимизни режалаштирсак, мазкур жараёнларни анча камайтиришимиз мумкин", — дея қўшимча қилди иқлимшунос.
Иқлим ўзгариши Тошкент атрофидаги ҳудудлар, хусусан, Қозоғистон жанубидаги чўлларга ҳам таъсир қилмоқда. У ерда суғориладиган майдонлар ишдан чиқиши оқибатида шамол чўлдаги майда чанг заррачаларини ҳудудимизга олиб келмоқда.