ТОШКЕНТ, 21 ноя — Sputnik. Жаҳон банки Ўзбекистоннинг электрон тижоратга тайёргарлик индексини ишлаб чиқди. Уни шу йил охиригача нашр этилиш режалаштирилган. Бу ҳақида Жаҳон банкининг электрон тижорат бўйича эксперти Илҳом Алиев маълум қилди, дея хабар берди Sputnik Ўзбекистон.
Тошкентда Халқаро ПЛАС-форуми бўлиб ўтмоқда. Унда қайд этилишича, Жаҳон банки томонидан тайёрланган индекс республиканинг ҳар бир ҳудудининг электрон тижоратга тайёрлигини кўрсатади.
Масалан, дастлабки натижаларга кўра, Тошкент энг яхши кўрсаткичга эга бўлган бўлса, Сурхондарё вилоятида камроқ тайёргарлик кўрилган.
"Таҳлил қилишда мутахассислар, масалан, истеъмолчиларнинг кўникмалари, интернетга кириш ва товарларни этказиб бериш каби кўрсаткичларни ҳисобга олишган", — деди Алиев.
Индексни тузиш устида Россия Олий Иқтисодиёт мактаби, Гарвард бизнес мактаби, Хитой электрон тижорат ассоциацияси ва Тошкентдаги Вестминстер университети иштирокида халқаро экспертлар гуруҳи ишлаган.
Эслатиб ўтамиз, ўтган йили Жаҳон банки ривожланиш сиёсатини қўллаб-қувватлаш бўйича операция доирасида Ўзбекистонга маблағ ажратишни маъқуллаган эди. Унда Ўзбекистон ҳукуматига 470 миллион доллар миқдоридаги имтиёзли кредитлар ва 480 миллион доллар миқдоридаги паст фоизли кредитларни ўз ичига олган молиявий пакет шаклида тақдим этилиши назарда тутилган.
Шунингдек, шу йил Жаҳон банки Тошкент вилоятининг Оҳангарон туманида чорвачиликни ривожлантириш учун 1 млн 600 минг доллар миқдорида маблағ ажратди. Мазкур маблағ Чорвачилик ва паррандачилик илмий-тадқиқот институтининг Оҳангарон бўлимига ажратиладиган бўлди.