ТОШКЕНТ, 28 сен — Sputnik. Тошкент шаҳри Сергели туманидаги “Inter Logistics“ МЧЖ омборхонасида юз берган портлаш юзасидан жиноий иш қўзғатилди. Бу ҳақда Ички ишлар вазирлиги ахборот хизмати маълум қилди.
“Мазкур ҳолат юзасидан ИИВ Тергов департаменти томонидан Ўзбекистон Республикаси ЖКнинг 259-моддаси (Ёнғин хавфсизлиги қоидаларини бузиш) 2-қисми “а” ва ”б” бандлари билан жиноят иши қўзғатилган”, - дейилган хабарда.
Ҳозир жиноят иши юзасидан тегишли идораларнинг мутахассисларидан иборат тергов-тезкор гуруҳи тузилган. Ёнғин келиб чиқиш сабабларини аниқлаш мақсадида судга оид тегишли экспертизалар тайинланган. Кечиктириб бўлмайдиган тергов ҳаракатлари амалга оширилмоқда.
Вазирлик воқеа тафсилотлари юзасидан ахборот бериб борилишини қўшимча қилган.
Эслатиб ўтамиз, 28 сентябр куни соат 02:43 да Тошкент шаҳрининг Сергели туманида “Inter Logistics” компанияси омборида кучли портлаш содир бўлди.
ССВ хабарига кўра, ҳодиса оқибатида жабрланганларнинг умумий сони 163 нафарни ташкил этмоқда. 2006 йилда туғилган бир нафар ўсмир бола эса воқеа жойида вафот этган.
Ҳодиса тафсилотларини ўрганиш юзасидан бош вазир ўринбосари Очилбой Раматов бошчилигида Ҳукумат комиссияси тузилган.