Тошкентдаги кучли портлаш: айни дамда нималар содир бўлмоқда — фото, видео

Сергелидаги портлаш оқибатида товар тўлиқ яроқсиз ҳолатга келган бўлса, ушбу товарга нисбатан иқтисодий сиёсат чоралари қўлланилмайди.

Бу ҳақда Божхона қўмитаси матбуот хизмати бош инспектори Ҳусан Тангриев маълум қилди.

Сергели туманидаги фавқулодда ҳолат содир бўлган омборда божхона органлари томонидан қатор чора-тадбирлар давом эттирилмоқда. Хусусан, Божхона қўмитаси томонидан махсус ишчи гуруҳ ташкил қилинган бўлиб, ёнғиндан зарар кўрган божхона назорати остидаги товарлар тўлиқ инвентаризациядан ўтказилмоқда.

Сергели туманидаги 26 та кўп қаватли уйдаги 592 та хонадон ҳамда 8 та хизмат кўрсатиш шаҳобчаси, 1 та мактаб ва 2 та МТТ биноларининг фасад қисми ҳамда дераза-ромларига зарар етган — Тошкент шаҳар ҳокимлиги.

Элбек Шукуровнинг айтишича, ёнғиндан жабр кўрган аҳоли доимий назоратга олинган.

ИИВга кўра, Жиноят кодексининг 259-моддаси (Ёнғин хавфсизлиги қоидаларини бузиш) 2-қисми “а” ва ”б” бандлари билан жиноят иши қўзғатилган.

Портлаш оқибатида жабрланганларнинг умумий сони 163 нафарни ташкил этмоқда.

Шундан жами 24 нафари Республика шошилинч тиббий ёрдам илмий маркази ва унинг Тошкент вилояти филиали, Тошкент шаҳар тез тиббий ёрдам шифохонаси, 1-сонли Республика ва 1-сонли шаҳар клиник шифохоналари ҳамда 1-сонли шаҳар туғуруқхонасига ётқизилди.

Қолган 134 нафар жабрланган аҳоли вакилининг саломатлиги яхши бўлганлиги учун амбулатор тиббий ёрдам кўрсатилиб, уйига жавоб берилган.

Ҳодиса оқибатида 2006 йилда туғилган бир нафар ўсмир воқеа жойида вафот этган ва шифохонага тириклик аломатлари бўлмаган ҳолда олиб келинган.