ТОШКЕНТ, 11 июл — Sputnik. Фавқулодда вазиятлар, Мудофаа ва Экология вазирликлари Тошкент вилояти Бўстонлиқ туманидаги Чотқол давлат биосфера резервати ҳудудидаги ёнғинни ўчирмоқда.
ФВВ матбуот хизмати хабарига кўра, 11 июль куни соат 14:00 Чотқол қўриқхонасининг Майдонтол ва Лайлакчи бўлимлари ҳудудида ёнғин содир бўлгани ҳақида хабар келиб тушган.
Дастлабки маълумотларга кўра, ёнғин майдони ўрмоннинг 10 гектардан 20 гектаргача бўлган ҳудудни ташкил этади.
ФВВ ўрмон ёнғинларини бартараф этиш бўйича махсус отряди ходимлари зудлик билан манзилга етиб борган. Ёнғинни бартараф этишга Мудофаа, Экология, атроф-муҳитни муҳофаза қилиш ва иқлим ўзгариши вазирликлари ҳамда бошқа ихтисослаштирилган тузилмаларнинг куч ва воситалари ҳам жалб этилган.
Таъкидланишича, вазият тўлиқ назорат остида. Ёнғинни ўчириш бўйича қўшимча маълумот кейинроқ тақдим этилади.
Эслатиб ўтамиз, 8 июль куни ҳам Чотқол қўриқхонаси ҳудудида ёнғин содир бўлган эди.