ТОШКЕНТ, 4 июн — Sputnik. Жорий йилнинг январь-апрель ойларида 2 019,4 минг нафар чет эл фуқаролари туристик мақсадларда Ўзбекистонга ташриф буюрган. Бу ҳақда Статистика агентлиги маълум қилди.
Шундан, ҳаво транспортида келган сайёҳлар 311,2 минг кишини (15,4 %), темир йўл орқали келганлар – 29,1 минг кишини (1,4 %), автомобиль транспортида келганлар – 9,6 минг кишини (0,5 %) ташкил этган.
Сайёҳларнинг энг кўп қисми, яъни 1 669,4 минг нафари (82,7 %) пиёда келган. Бунда асосан қариндошларини йўқлаш учун келганлар чегара постларидан пиёда ўтишган.
Эслатиб ўтамиз, тўрт ойда энг кўп Тожикистон фуқаролари (623,8 минг нафар) туристик мақсадда Ўзбекистонга ташриф буюрган эди.