ТОШКЕНТ, 8 май — Sputnik. Марказий сайлов комиссияси (МСК) қонунда белгиланган талаблардан келиб чиқиб муддатидан илгариги Ўзбекистон президенти сайловини ўтказиш бўйича тайёргарлик ишларини бошлади. Бу ҳақда МСК матбуот хизмати хабар қилди.
8 май куни Шавкат Мирзиёев "Муддатидан илгари Ўзбекистон Республикаси президенти сайловини тайинлаш тўғрисида"ги фармонини имзолади. Унга кўра, Конституциянинг 110 ва 128-моддалари ҳамда Сайлов кодексининг 66-моддасига асосан 9 июль кунига муддатидан илгари президент сайлови тайинланди.
Қайд этилишича, шу муносабат билан 10 май куни соат 11:00 да Марказий сайлов комиссиясининг мажлиси бўлиб ўтади. Унда муддатидан илгари президентлик сайлови бўйича сайлов кампанияси бошланиши эълон қилинади.
Бундан ташқари, сайловга тайёргарлик кўриш ва уни ўтказишга доир тадбирларни амалга ошириш муддатларини белгилаш масалалари кўриб чиқилади.