ТОШКЕНТ, 6 апр — Sputnik. Самарқанд шаҳрида 14 апрель куни Мустақил Давлатлар Ҳамдўстлиги (МДҲ) Ташқи ишлар вазирлари кенгаши (ТИВК) йиғилиши бўлиб ўтади. Бу ҳақда Ўзбекистон ТИВ матбуот хизмати хабар берди.
Йиғилишда Ўзбекистон, Арманистон, Беларусь, Озарбайжон, Россия, Тожикистон, Туркманистон, Қирғизистон ва Қозоғистон делегациялари ҳамда МДҲ Ижроия қўмитаси иштирок этиши кутилмоқда.
Унда халқаро кун тартиби ва МДҲ доирасидаги ҳамкорликнинг долзарб масалалари юзасидан фикр алмашиш, қўшма дастурлар ижроси ҳамда МДҲ давлат раҳбарлари кенгашига кўриб чиқиши учун киритиладиган ҳужжатлар лойиҳалари муҳокамаси кўзда тутилган.
Шу куни Самарқандда Марказий Осиё давлатлари ва Россия ташқи ишлар вазирларининг олтинчи учрашуви бўлиб ўтади.
Бундан ташқари, 13 апрель куни бу ерда Афғонистонга қўшни давлатлар ташқи ишлар вазирларининг учрашуви бўлиб ўтади. Ўзбекистон, Эрон, Покистон, Россия, Тожикистон, Туркманистон ва Хитой ташқи ишлар вазирлари Афғонистондаги мавжуд вазиятни кўриб чиқадилар.
Эслатиб ўтамиз, аввалроқ Россия ТИВ расмий вакили Мария Захарова вазир Сергей Лавров Самарқанддаги йиғилишларда иштирок этишини тасдиқлаган эди.