ТОШКЕНТ, 30 янв — Sputnik. Бугун, 30 январь куни, республика ҳудуди бўйлаб ёғингарчилик кутилмайди, деб хабар бермоқда Ўзгидромет.
31 январь куни мамлакат ҳудудига Ўрта ер денгизи ҳудудларидан нам ва деярли илиқ ҳаво массалари кириб келиши кутилмоқда. Бунинг натижасида республика бўйлаб ҳафта давомида беқарор об-ҳаво бўлади.
Синоптиклар прогнозига кўра, 1 февралдан 3 февралгача Ўзбекистон бўйича вақти-вақти билан ёғингарчилик, асосан ёмғир кўринишида бўлади. Самарқанд, Жиззах, Тошкент вилоятларида 1-2 февралда баъзи жойларда кучли бўлади. Республиканинг тоғолди ва тоғли ҳудудларида ёғингарчилик 1-2 февраль кунлари кучли бўлади.
31 январь ва 1-2 февраль кунлари республика бўйлаб баъзи жойларда шамол тезлиги 15-20 м/с гача кучайиши кутилмоқда. 1-2 февралда Навоий, Самарқанд, Жиззах вилоятларининг айрим жойларида шамол 25-28 м/с гача кучайиши мумкин.
Ҳаво ҳарорати ҳафта давомида меъёр атрофида бўлади ва кечалари -1...+4 даража, кундуз кунлари +5...+10 даражани ташкил этади.
Пойтахтда бугун ёғингарчилик кутилмайди. Ҳарорат +7...+9 даража бўлади.
31 январь куни бироз ёғингарчилик бўлиши мумкин. Шамол 7-12 м/с тезликда эсади. Ҳарорат кечаси +0...+2 даража, кундузи +7...+9 даража бўлади.
1-2 февралда вақти-вақти билан ёмғир ёғади. Шамол тезлиги 12-17 м/с гача кучайиши мумкин. Ҳарорат кечалари +2...+5 даража, кундуз кунлари +5...+10 даража бўлади.