ТОШКЕНТ, 15 ноя - Sputnik. Украинадаги вазиятни ҳал қилишдаги барча муаммолар нореал шартларни илгари сураётган Киевдан келиб чиқади. Бу ҳақда Россия ташқи ишлар вазири Сергей Лавров Индонезиядаги G20 йиғилишидаги матбуот анжуманида таъкидлади.
ТИВ раҳбари саммит доирасида Германия канцлери Олаф Шольц ва Франция президенти Эммануэль Макрон билан қисқа суҳбатлар ўтказганини қайд этди.
“Улар Украина бу жараённи секинлаштираётганини (ҳал қилиш - таҳр.) жуда яхши билади. Бу савол бизга йўналтирилиши керак эмас. Ҳамма муаммо Украина томонида, улар ҳар қандай музокараларни қатъиян рад этиб, бугунги вазиятда амалга ошириб бўлмайдиган шартларни илгари сурмоқда. Россия музокараларга тайёр эканини бир неча бор тасдиқлаган. Киев ушбу позицияда қанча узоқ қолса, келишиш шунчалик қийин бўлади”, дея давом этди Россия дипломатияси раҳбари.
“Украина президенти Владимир Зеленскийнинг G20 саммитидаги нутқи ёзувда намойиш этилди”, дейди Лавров.
Унинг таъкидлашича, нутқ 20 дақиқа давом этган, қолган иштирокчиларнинг ҳар бирига эса қатъий уч дақиқадан вақт ажратилган. Лавровнинг сўзларига кўра, Зеленскийнинг мурожаати “жуда қизиқарли” бўлган.
Лавров айтишига кўра, Зеленскийнинг бутун нутқи моҳиятини ягона ибора акс эттиради.
“Ушбу нутқнинг мазмуни ва бу одамнинг бугунги ҳолати унинг қуйидаги ибораси билан энг яхши тавсифланади. Унинг сўзларига кўра, Иттифоқчиларнинг 1944 йилда Нормандияга десант тушириши Иккинчи жаҳон урушида бурилиш нуқтаси бўлган. Бундан ўзингиз хулоса чиқаринг", - деб қисқа изоҳ берди Лавров Зеленскийнинг нутқига.
Эслатиб ўтамиз, "Катта йигирматалик"нинг йиғилиши 15-16 ноябрь кунлари Балида бўлиб ўтмоқда. Россия президенти Владимир Путин ушбу йиғилишга бормади. Россия делегациясига Ташқи ишлар вазири Сергей Лавров бошчилик қилмоқда. G20 саммити иштирокчилари 16 ноябрь куни бўлиб ўтадиган учрашув якунлари бўйича якуний декларацияни тасдиқлайди.