ТОШКЕНТ, 23 окт — Sputnik. Ўзбекистон президенти Шавкат Мирзиёев Хитой Халқ Республикаси раиси Си Цзиньпинга Хитой Коммунистик партиясининг XX қурултойи муваффақиятли ўтказилгани ва у партиянинг Марказий қўмитаси бош котиби лавозимига қайта сайлангани муносабати билан табрик йўллади. Бу ҳақда Ўзбекистон етакчиси матбуот котиби Шерзод Асадов маълум қилди.
Мирзиёев Си Цзиньпин томонидан эълон қилинган янги режалар ва олға сурилган барча ташаббуслар Хитой давлатининг гуллаб-яшнашига муносиб ҳисса қўшиши ва унинг халқаро нуфузини янада юксалтиришига ишонч билдирган.
Бугунги кунда Хитой Ўзбекистоннинг етакчи савдо ҳамкорига айлангани, икки мамлакат ўртасидаги кўп қиррали ҳамкорлик барча соҳаларда жадал ривожланиб бораётгани алоҳида қайд этилган.
“Сиз, азиз биродарим билан бундан кейин ҳам дўстона ва очиқ мулоқотларни давом эттиришга тайёрлигимни билдираман. Ишончим комилки, келажакда Ўзбекистон-Хитой ўзаро манфаатли алоқаларини биргаликдаги саъй-ҳаракатларимиз билан янада юқори чўққиларга албатта олиб чиқамиз”, - дейилади мактубда.
Ўзбекистон раҳбари Си Цзиньпинга сиҳат-саломатлик, оилавий бахт-саодат ва масъулиятли давлатчилик фаолиятида янги зафарлар, дўст Хитой халқига эса тинчлик ва давомий равнақ тилаган.
Аввалроқ Си Цзиньпинни учинчи муддатга Хитой Коммунистик партияси Марказий Қўмитаси бош котиби лавозимига қайта сайлангани хабар қилинган эди.