ТОШКЕНТ, 30 сен – Sputnik. АҚШ ҳукумати Афғонистон билан чегарадош мамлакатлар билан уларнинг ҳарбий объектлари, жумладан, Россия базаларидан террорчиликка қарши амалиёт ўтказиш учун фойдаланиш борасида музокаралар олиб бормоқда. Бу ҳақда “Politico” ўз манбаларига таянган ҳолда хабар бермоқда.
29 сентябрь куни Пентагон раҳбарияти иштирокида эшитувларнинг ёпиқ қисми бўлиб ўтган.
Бу ёпиқ мажлисда қатнашган сенаторларга таяниб хабар қилаётган нашр маълумотларига кўра, Пентагон вакиллари музокаралар Тожикистон, Ўзбекистон, Қирғизистон ва бошқа мамлакатлар ҳукуматлари билан олиб борилаётганини маълум қилишган.
Гап бу мамлакатларга америкаликлар томонидан ташлаб кетилган Афғонистонда террорчиликка қарши амалиётлар учун “уфқ ортидаги” воситаларни жойлаштириш ҳақида бормоқда.
“Бу объектлар бу мамлакатларда Россия томонидан фойдаланилаётган базаларни ҳам ўз ичига олиши мумкин”, - дейилган хабарда.