ТОШКЕНТ, 30 авг – Sputnik. Толиблар тайинланган Афғонистон олий таълим вазири Абдул Баки Ҳаққоний мамлакатда талаба қизлар ва ўғил болалар алоҳида синфларда таҳсил олишини маълум қилди, дея ёзади РИА Новости.
Унинг сўзларига кўра, қизлар таълим олиш ҳуқуқига эга, аммо улар ўғил болалар билан бирга ўқий олишмайди.
“Бу орқали талаба қизларнинг “хавфсиз таълим муҳити” таъминланади”, - дейди Ҳаққоний.
Вазир, шунингдек, тез орада университетлар қайта очилиши ва ўқитувчиларга маош тўланишини ваъда қилган.
Аввалроқ Афғонистон Олий таълим вазирлиги Кобулда университет профессорлари, академиклар ва вазирликнинг собиқ амалдорлари иштирокида конференция ўтказганди. Унда собиқ таълим ходимлари ва университет профессорлари "Толибон"*га таълимнинг янги шаклини яратиш ўрнига мавжуд таълим тизимини сақлаб қолиш ва модернизация қилишга чақирган.
* Россия ва қатор мамлакатларда тақиқланган террорчилик ташкилоти