ТОШКЕНТ, 15 фев — Sputnik. Ўзбекистонда янги қурилаётган уй-жой комплекслари орасида қурувчи компаниялар ҳисобидан қўшимча мактаб ҳам қуриб берилади.
Халқ таълими вазири Шерзод Шерматовнинг сўзларига кўра, президент Давлат дастури муҳокамасидаги видеоселекторда ушбу ижобий тажрибани барча ҳудудлардаги янги қурилаётган уй-жой комплексларига кенг жорий этиш бўйича ҳудудлар раҳбарларига топшириқ берган.
“Ҳар бир янги қуриладиган хонадонга тахминан 1,5 ўқувчи ўрнини ҳисобини олиб, давлат мактаби қуриб бериш керак бўлади. Шунда тижорат мақсадларида 1000 та квартирали комплекс қурилса, 1500 ўринли давлат мактаби ҳам қуриб топширилади”, - дея ёзади вазир.
Шерматовнинг таъкидлашича, бу ўз навбатида мактабларга ажратилаётган инвестиция дастуридаги мавжуд маблағлар доирасида узоқроқ ҳудудлардаги кўпроқ мактабларни капитал таъмирлашга имконият беради.
“Чунки вилоят марказида 1 та янги мактаб қуришга кетадиган харажат ҳисобига туманларда камида 10−15 та мактабни зўр қилиб капитал таъмирласа бўлади”, — деди у.
ХТВ раҳбари ОАВ ва жамоатчилик вакилларини ушбу яхши тажрибани бемалол жойига бориб кўришга, қурувчи ва девелопер компаниялар орасида кенгроқ тарқатишга, жойлардаги бошқа янги қурилишларда ҳам назоратга олишда ёрдам беришга чорлаган.
Эслатиб ўтамиз, президент имзолаган “2021–2023 йилларда Ўзбекистоннинг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарорда мамлакатда яна 22 та боғча, 31 та мактаб ва 16 та ОТМ қурилиши назарда тутилган.