Тошкент учун “Ечимлар атласи” тайёрланди — унда нималар акс этган?
© Sputnik / Бахром Хатамов
Oбуна бўлиш
“Ечимлар атласи” Тошкент шаҳри бош режасининг мантиқий давоми ҳисобланади
ТОШКЕНТ, 10 июл — Sputnik. Президент Шавкат Мирзиёев Тошкент ва Янги Тошкент шаҳри учун “ечимлар атласи” тақдимоти билан танишди, дея хабар берди давлат раҳбари матбуот хизмати.
Қайд этилишича, Тошкентнинг 2045 йилгача бўлган даврга мўлжалланган бош режаси қабул қилинди. Унда шаҳарнинг қурилиш режалари, муҳандислик ва йўл-транспорт инфратузилмаси, муҳофаза ҳудудлари бўйича асосий кўрсаткичлар белгиланган.
“Ечимлар атласи” ушбу Бош режанинг мантиқий давоми бўлиб, унда шаҳарнинг ташқи қиёфаси, кўчалар муҳити бўйича умумий талаблар қайд этилган.
Представлены планы по улучшению облика Ташкента
© Пресс-служба президента Узбекистана
“Бу каталог-маълумотнома қурилмаларни лойиҳалаштириш, ўрнатиш ва улардан фойдаланиш қоидаларини қамраб олган бешта китобдан иборат. Ҳар бир қисмда жамоат жойларини ташкиллаштириш ва ободонлаштириш, биноларнинг ташқи қисмини ягона меъморий қиёфага келтириш бўйича тавсиялар берилган”, — дейилади хабарда.
Масалан, ҳозирги стандарт бўйича йўлларни қуриш ва таъмирлаш қатнов қисмининг “қизил чизиғи”гача бажарилади. Ривожланган шаҳарлар тажрибасида бу кўчанинг икки тарафидаги бинодан биногача тамойилида амалга оширилади. Шунда оралиқда қаровсиз жой қолмай, йўл бўйи яхлит ва мутаносиб ободонлаштирилади.
Представлены планы по улучшению облика Ташкента
© Пресс-служба президента Узбекистана
“Атлас шаҳар муҳитини лойиҳалашда барқарор ривожланиш мақсадларини ҳамда миллий колоритни татбиқ этишга хизмат қилади. Уйғун ва экологик тоза масканларни яратишга кўмаклашиб, аҳолининг ҳаёт сифатини яхшилайди. Очиқ жамоат жойларини ривожлантириш бўйича янги лойиҳаларда хатоларга йўл қўймаслик имконини беради”, — дея қайд этилган хабарда.
Тақдимотда ушбу талабларнинг мазмун-моҳияти ва ундан келиб чиқадиган вазифалар кўриб чиқилди. Шаҳарнинг ўзига хослигини сақлаган ҳолда қиёфасини янада яхшилаш, йўл бўйларини ободонлаштириш, турмуш маданиятини ошириш бўйича кўрсатмалар берилди.
