ТИВ ўзбекистонликларни Исроил ва Эрон можароларига нисбатан вазмин бўлишга чақирди
15:53 17.06.2025 (янгиланди: 15:57 17.06.2025)
© Sputnik / Павел Лисицын
Oбуна бўлиш
ТИВ: Ўзбекистон фуқароларини тинчликпарварлик, бағрикенглик ва масъулиятли фуқаролик позициясини сақлашга чақириб қоламиз.
TOШКЕНТ, 17 июн — Sputnik. Ўзбекистон Ташқи ишлар вазирлиги фуқаролардан Исроил ва Эрон можароларига нисбатан диний, ирқий ёки бошқа шахсий мансубликлар асосида муносабат билдирмасликни сўради.
Қайд этилишича, сўнгги кунларда Исроил ва Эрон ўртасидаги кескинлик янада кучайиб, қуролли тўқнашувларга айланди. Бу нафақат минтақада, балки бутун дунё ҳамжамиятида жиддий хавотир уйғотмоқда.
Можаронинг авж олиши бутун минтақа барқарорлиги ва тинчлигига таҳдид солаётгани шубҳасиз. Бу жараёнлар, аввало, оддий фуқаролар – тинч аҳоли, айниқса болалар ва аёллар учун оғир оқибатларга олиб келмоқда.
“Ўзбекистон Республикаси урушни муаммоларни ҳал этиш воситаси деб эмас, балки инсон ҳаёти, барқарорлик ва тараққиётга жиддий хавф солувчи ҳолат сифатида баҳолайди. Урушда ғолиб бўлмайди. Энг катта йўқотишни доим оддий инсонлар тортган ва бугун ҳам шундай бўлмоқда”, — дейилади вазирлик эълон қилган хабарда.
Қайд этилишича, Ўзбекистон ҳар доим тинчликпарвар сиёсат юритиб келган ва шундай давом этади. Мамлакат барча давлатлар билан дўстона ва ўзаро манфаатли ҳамкорлик муносабатларини ривожлантириб келмоқда.
“Шу муносабат билан, Ўзбекистон фуқароларини тинчликпарварлик, бағрикенглик ва масъулиятли фуқаролик позициясини сақлашга чақириб қоламиз. Можароларга нисбатан диний, ирқий ёки бошқа шахсий мансубликлар асосида муносабат билдирмаслик, ҳар қандай нафрат ва зиддият тарғибига қарши туриш барчамизнинг умумий бурчимиздир”, — дея қайд этилган хабарда.
Шунингдек, фуқаролар турли провокация ва ҳақоратомуз чақириқларга учмасликка, ҳолатларга нисбатан ҳиссиёт эмас, балки вазмин муносабатни сақлаб қолишга даъват этилган.
“Жамиятимизда миллий ва диний тотувликни сақлаш – умумий барқарорлик ва хавфсизликнинг муҳим кафолати эканлигини эслатамиз. Ўзбекистон Республикаси Ташқи ишлар вазирлиги барча можаролар халқаро ҳуқуқ нормалари ва дипломатик мулоқот асосида тинч йўл билан ҳал этилиши тарафдори эканини яна бир бор таъкидлайди. Тинчлик ва ўзаро ҳурмат асосидаги муносабатлар ҳар доим юртимиз ташқи сиёсатининг устувор йўналиши бўлиб қолади”, — дея хулоса қилинган хабарда.
