Россия ТИВ Исроилнинг Эронга ҳужумини қоралади
© Sputnik / Евгений Одиноков
Oбуна бўлиш
Россия ТИВ: кескинликнинг янада кучайиши ва минтақанинг кенг кўламли урушга айланиб кетишига йўл қўймаслик учун томонларни вазминликка чақирамиз.
TOШКЕНТ, 13 июн — Sputnik. Россия ташқи ишлар вазирлиги Исроилнинг халқаро ҳуқуқ нормаларини бузган ҳолда куч ишлатиш ҳаракатини кескин қоралади. Бу ҳақда вазирликнинг Исроилнинг Эрон ҳудудига берган зарбалари муносабати билан эълон қилган баёнотида маълум қилинган.
“Яқин Шарқдаги кескинликнинг хавфли тус олиши муносабати билан чуқур хавотир билдирамиз. Исроил Давлатининг 13 июнга ўтар кечаси Бирлашган Миллатлар Ташкилоти низоми ва халқаро ҳуқуқ нормаларини бузган ҳолда куч ишлатиш ҳаракатини кескин қоралаймиз. БМТга аъзо суверен давлатга, унинг фуқароларига, уйқудаги тинч шаҳарларга, ядро-энергетика инфратузилмаси объектларига асоссиз ҳарбий зарбалар бериш мутлақо номақбулдир”, — дейилади хабарда.
Айтилишича, Исроил ҳужумлари Халқаро атом энергияси агентлиги (ХАЭА) Бошқарувчилар кенгаши сессияси ўртасида ҳамда Эрон ва АҚШ расмийлари ўртасидаги билвосита алоқаларнинг навбатдаги босқичи арафасида содир бўлди.
“Шундай қилиб, қарама-қаршиликни камайтириш ва Эроннинг тинчлик атомига нисбатан ҳар қандай шубҳа ва нотўғри қарашларни бартараф этишга қаратилган кўп томонлама саъй-ҳаракатлар барбод бўлди ва ортга сурилди. Кўриниб турибдики, Ғарбий Қуддусда кескинликни янада кучайтириш ва ставкаларни ошириш фойдасига онгли равишда танлов қилинган. Минтақадаги барқарорлик ва хавфсизликка таҳдид солувчи ҳарбий авантюраларнинг ҳалокатли эканлиги ҳақида бир неча бор огоҳлантирилди. Ушбу провокациянинг барча оқибатлари учун жавобгарлик Исроил раҳбарияти зиммасига тушади”, — дея қайд этилган хабарда.
ХАЭА Бош директоридан содир бўлаётган воқеаларга вазмин ва холис баҳо беришини, жумладан, Эрондаги ядровий объектларга уюштирилган ҳужумларнинг эҳтимолий радиологик оқибатларини синчковлик билан таҳлил қилишини кутиб қоламиз, дейилган хабарда.
“Шунингдек, биз ХАЭА Бошқарувчилар кенгашида Эронга қарши жазава қўзғатган ва ўзларининг сиёсий хоҳиш-истаклари ва фобияларини қондириш учун яна бир бор жазо резолюциясини илгари сурган Ғарб давлатлари ўзларининг бузғунчи йўлининг ҳалокатли натижаларини ва бу фожиа учун ўз айблари кўламини тан олишларига умид қиламиз. Эронга ҳужум қилишни режалаштирган, ишлаб чиққан ва амалга оширганлар қандай изоҳлар билан ниқобланмасин, Эрон ядро дастури атрофида келишувга эришиш ҳарбий-куч билан ҳал қилинмайди ва фақат тинч, сиёсий-дипломатик йўл билан амалга оширилиши мумкинлигига қатъий ишонамиз. Умид қиламизки, айнан шундай ёндашув охир-оқибат ғалаба қозонади”, — дейилган баёнот матнида.
Хабарда кескинликнинг янада кучайиши ва минтақанинг кенг кўламли урушга айланиб кетишига йўл қўймаслик учун томонлар вазминликка чақирилган. Шу муносабат билан АҚШ Ўмонда Эрон билан Эрон ядро дастури бўйича музокараларнинг навбатдаги раундини ўтказишга тайёрлиги эслатиб ўтилган.
