Мирзиёев инвесторларни муваффақият тарихининг чинакам иштирокчисига айланишга чорлади
© Пресс-служба президента Узбекистана
Oбуна бўлиш
Шавкат Мирзиёев: биз инвесторлар учун очиқ, эркин, барқарор ва ишончли мамлакат – Янги Ўзбекистонни барпо этмоқдамиз.
TOШКЕНТ, 11 июн — Sputnik. Ўзбекистон инвесторларни шунчаки сармоя киритишга эмас, балки муваффақият тарихининг чинакам иштирокчиларига айланишга чорлайди. Бу ҳақда Ўзбекистон президенти Шавкат Мирзиёев раислигида ўтган Хорижий инвесторлар кенгашининг навбатдаги ялпи мажлисида маълум қилди.
“Биз бугунги учрашувга мутлақо бошқача тайёргарлик кўрдик. Хорижий корхоналар билан бирма-бир гаплашиб, билдирилган 40 тадан зиёд ташаббусларни саралаб олдик. Жумладан, сармоядорлар солиқ қонунчилиги барқарорлигини таъминлаш, тўғридан-тўғри амал қиладиган қонунларни кўпайтириш, инфратузилма соҳаларида хусусий сектор улушини ошириш бўйича таклифларни бердилар”, — дея қайд этди президент.
Айтилишича, уларнинг барчаси инобатга олинади ва Кенгаш аъзолари билан ҳар бир таклиф устида жиддий ишланмоқда.
“Кўп мурожаатлар электр тармоқларига уланиш бўйича келиб тушди. Бунда, албатта, энг илғор хорижий тажрибадан фойдаланишимиз шарт ва зарур. Шунинг учун бу борада Кенгашимиз қошида алоҳида ишчи гуруҳ тузиб, аниқ механизмларни ишлаб чиқишни таклиф қиламан. Тушган таклифлардан келиб чиқиб, гаров тўғрисидаги қонунчиликни такомиллаштириш, хорижий компаниялар учун профессионал кадрларни тайёрлаш, маҳаллий компанияларда корпоратив бошқарувни яхшилаш, солиқ маъмурчилиги бўйича қўшимча ишчи гуруҳлар ташкил этилади”, — деди Мирзиёев.
Қайд этилишича, республикада сўнгги икки йилда чет эл капитали иштирокидаги 5,5 мингта янги корхона ташкил этилди. Уларнинг умумий сони 16 мингтага етди.
“Яна бир бор таъкидламоқчиман: биз инвесторлар учун очиқ, эркин, барқарор ва ишончли мамлакат – Янги Ўзбекистонни барпо этмоқдамиз. Бу йўлда бошлаган ва ортга қайтмас тус олган ислоҳотларимизни бундан буён ҳам изчил давом эттирамиз. Сизларни юртимизга шунчаки сармоя киритишга эмас, балки муваффақиятимиз тарихининг чинакам иштирокчиларига, биз яратаётган буюк келажакнинг ажралмас қисмига айланишга чорлаймиз”, — дея фикр билдирди Ўзбекистон етакчиси.
