ФИФА раҳбари Мирзиёевни табриклади
11:25 07.06.2025 (янгиланди: 11:35 07.06.2025)
Oбуна бўлиш
Жанни Инфантино Мирзиёев билан яна бир бор учрашиш имкониятини интиқлик билан кутишини таъкидлаган.
TOШКЕНТ, 7 июн — Sputnik. Футбол ассоциациялари халқаро федерацияси (ФИФА) раҳбари Жанни Инфантино Ўзбекистон президенти Шавкат Мирзиёевга мактуб йўллади. Бу ҳақда президент матбуот котиби хабар берди.
“Ҳурматли Президент! Кеча Ўзбекистон ўз тарихида илк бор ФИФА Жаҳон чемпионатига чиқиб, Осиёда биринчи бўлиб ЖЧ-2026 йўлланмасини қўлга киритган терма жамоалардан бирига айланди. Бутун футбол жамоатчилиги номидан сизни ва бутун Ўзбекистон халқини ушбу муносиб ва тарихий натижа билан табриклашга ижозат бергайсиз. Бундай ажойиб ютуқ ушбу муваффақиятга алоқадор бўлган барчанинг биргаликдаги саъй-ҳаракатлари ва қатъий иродаси туфайли амалга ошди. Сизга, ҳукуматингизга, Ўзбекистон футбол ассоциациясига, футболчиларга, мураббийга, барча ходим ва раҳбарларга, шунингдек, албатта, қалби қайноқ мухлисларга самимий табрикларимни йўллайман”, - дейилган мактубда.
Жанни Инфантино 2026 йилги ФИФА Жаҳон чемпионатида муваффақият тилаган. Шунингдек, Мирзиёев билан яна бир бор учрашиш имкониятини интиқлик билан кутишини таъкидлаган.
Эслатиб ўтамиз, футбол бўйича Ўзбекистон миллий терма жамоаси БААга қарши ўйинда 0:0 натижа қайд этди ва узоқ кутилган жаҳон чемпионати йўлланмасини қўлга киритди.
