“Сайлов вақти келди”: Трампнинг Украина ва Зеленский бўйича асосий баёнотлари
10:08 20.02.2025 (янгиланди: 11:02 20.02.2025)
© AP Photo / Ben Curtis
Oбуна бўлиш
Трамп Зеленский туфайли Украина парчаланиб кетганини айтди.
ТОШКЕНТ, 20 фев — Sputnik. АҚШ президенти Дональд Трамп Украинада узоқ вақтдан бери бўлмаган сайловларни ўтказиш вақти келганини айтди.
Владимир Зеленскийнинг ваколат муддати ўтган йилнинг 20 майида тугаган эди. Украинада 2024 йилги президентлик сайловлари ҳарбий ҳолат ва умумий сафарбарлик сабаб бекор қилинди. Зеленский ҳозир сайловларнинг вақти эмаслигини айтган.
"Сайлов вақти келди. Уларда анчадан бери сайлов ўтказилмади. Биласизми, биз сайлов ўтказа олмаймиз, дейиш жуда яхши, аммо сайлов вақти келди", — деди АҚШ етакчиси журналистларга.
Трампга кўра, Зеленский Украинада сайлов ўтказишдан бош тортмоқда.
"У сайлов ўтказишдан бош тортмоқда. Украинадаги сўровларда у паст кўрсаткичда", — деди Оқ уй раҳбари.
У, шунингдек, Зеленскийни “сайловсиз диктатор” деб атади ва уни фойда кўриш мақсадида Россия билан зиддиятни давом эттириш истагида эканлигини айтди.
“Сайловсиз диктатор, Зеленский шошгани маъқул, акс ҳолда унинг мамлакати қолмайди”, - дея қайд этди Трамп.
Трамп Зеленский даҳшатли иш қилгани ва у туфайли Украина парчаланиб кетганини ҳам таъкидлади.
"Зеленский даҳшатли иш қилди. Унинг мамлакати парчаланиб кетган ва миллион ва миллионлаб одамлар бекорга ҳаётдан кўз юмди", — деди у.
Трампнинг сўзларига кўра, “ўртамиён ҳажвчи” Зеленский фақат “Байден билан ўйнагани” учун яхши бўлган.
Трамп, шунингдек, АҚШнинг Украинага ёрдам бериш учун ажратган барча пуллари қаерга кетганини аниқлаш вақти келганини ҳам қўшимча қилди.
Оқ уй раҳбарининг бошқа баёнотлари:
Зеленский АҚШни ғалаба қозона олмайдиган уруш учун 350 миллиард доллар сарфлашга кўндирган;
Вашингтон Украина эҳтиёжлари учун Европадан 200 миллиард доллар кўпроқ ажратди, аммо бунинг эвазига ҳеч нарса олмади;
АҚШ иштирокисиз Зеленский ҳеч қачон Россия билан тинчлик музокараларини олиб бора олмайди;
Байден ҳатто Украинада келишувга эришишга уринмади;
Европа тинчликка эриш масаласида муваффақиятсизликка учради;
Оқ уй можарога барҳам бериш бўйича музокараларни муваффақиятли олиб бормоқда;
Киев АҚШ билан нодир ер металлари бўйича келишувни барбод қилди.
АҚШ президенти Украина можароси бир йил ичида ҳал бўлади, деб ҳисоблайди, агар АҚШнинг аввалги маъмуриятининг сиёсати давом этса, учинчи жаҳон уруши бошланиши мумкин. У "тинчлик" исташини алоҳида қайд этди.
Шунингдек, Дональд Трамп Владимир Путин билан ядросизланиш мавзусида ўтган муваффақиятли ҳамкорлик ҳақида гапириб, бу унга кейинги муваффақиятларга ишониш имконини беришини қўшимча қилди. Трамп ядровий можарога йўл қўймаслик кераклигини, бу Хиросима ва Нагасакидан “500 марта ёмонроқ” бўлишини айтди.
