Жазони ижро этиш тизими ходимлари бодикамералар билан таъминланади
© Sputnik / Екатерина Чеснокова
/ Oбуна бўлиш
Бодикамера ходим хизмат вазифасини бажаришга киришганидан бошлаб ишга туширилиши ва нарядни топширгунига қадар ишлатилиши лозим.
ТОШКЕНТ, 15 авг — Sputnik. Ҳар кунлик иш фаолиятини олиб бораётган ёки кунлик хизматга жалб этилган жазони ижро этиш тизими ходимлари бодикамералар билан таъминланади. Бу ҳақида ҳукуматнинг 445-сонли қарори билан тасдиқланган низомда назарда тутилган.
Ҳужжатда ходимларнинг хизматни бодикамералар билан ўташ тартиби белгиланди.
Янги тартиб маҳкумларни узлуксиз назорат қилиш ҳамда улар томонидан жиноят ва тартиббузарликлар содир этилишини аниқлаш учун йўлга қўйилмоқда.
Бодикамера қуйидаги ҳолларда ишлатилади:
кун тартибидаги тадбирларни амалга оширишда;
умумий ва кунлик тинтувлар ўтказиш ҳамда кўздан кечириш жараёнида;
маҳкумларни ЖИЭМга қабул қилишда;
жиноят ва тартиббузарликлар содир этилганда;
маҳкумларнинг хулқ-атворини назорат қилишда;
маҳкумлардан тақиқланган озиқ-овқат маҳсулотлари, нарса ва буюмлар олинганда;
маҳкумларга нисбатан жисмоний куч, махсус воситалар ҳамда тинчлантириш кўйлагини қўллаш чоғида;
маҳкумларни ишга олиб чиқиш ва ундан қайтишда;
маҳкумлар ва фуқароларни қабул қилиш жараёнида;
фуқаролардан олинган йўқловларни қабул қилишда ҳамда посилка ёки йўқлов ва бандеролларни тарқатиш вақтида;
маҳкумларнинг ариза ва шикоятларини кўриб чиқишда;
маҳкумларнинг учрашувларини ўтказиш жараёнида;
маҳкумларга нисбатан интизомий жазо ва рағбатлантириш чоралари қўлланилаётган вақтда ҳамда маҳкумлар интизомий бўлинмага киритилаётганда ва чиқарилаётганда;
маҳкумларнинг инсонпарварлик далолатномаларини кўриб чиқиш даврида.
Бодикамера ходим хизмат вазифасини бажаришга киришганидан бошлаб ишга туширилиши ва нарядни топширгунига қадар ишлатилиши лозим.
Бундай тартиб хизмат вазифаси билан боғлиқ бўлмаган ишларни бажариш вақти тадбиқ этилмайди.
Хизмат вазифасини бажариш давомида бодикамеранинг объективи ҳар қандай ҳолатда тўсилиши мумкин эмас.
Бодикамерадан шахсий мақсадларда фойдаланиш, уни бошқа ходимлар, маҳкумлар ва бошқа шахсларга бериш ҳамда ўз хоҳиши билан ўчириб қўйиш тақиқланади. Бодикамера хизмат вақтида доимо ишчи ҳолатда бўлиши шарт.
Маҳкум томонидан ходимга хизмат давомида берилган бодикамерага зиён етказиш, уни олиб қўйишга уриниш тақиқланади.
Шунингдек, маҳкумлар билан бодикамера орқали ёзиб олинган суҳбатларни Интернетга жойлаштириш, маҳкумнинг оила аъзоларига ва бошқа шахсларга бериш тақиқланади.
