ТОШКЕНТ, 12 дек - Sputnik. Сирдарёлик тадбиркор ўз рақибини йўқ қилиш учун киллер ёллашга қарор қилди. У буюртма қотилликни амалга ошириш учун муқаддам "босқинчилик" жинояти учун судланган фуқаронинг хизматидан фойдаланишга уринган, деб хабар бермоқда Бош прокуратура матбуот-хизмати.
Хабарда айтилишича, воқеа декабрь ойи бошида рўй берган.
Шахси сир сақланишини сўраган фуқаро прокуратурага ариза билан мурожаат қилиб, таниши - тадбиркор Ж.З. (1994 й.т., муқаддам судланган) унинг муқаддам "Босқинчилик" жинояти учун судланганлигидан хабар топиб, ўзига рақобатчи деб билган тадбиркор М.Д.ни ўлдиришга буюртма берганини маълум қилган.
Киллерлик хизмати эвазига 5 минг АҚШ доллари ваъда қилинган. Таклифни рад қилган тақдирда бошқа шахсларни ёллаб бўлса ҳам уни ўлдиришини айтиб, олдиндан минг АҚШ доллари бермоқчи бўлганлигини маълум қилган.
Аризачи уни жиноят содир қилишга ундаётган Ж.З.га нисбатан қонуний чора кўришни сўраган.
2020 йил 10 декабрь куни Сирдарё вилояти прокуратураси томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирда аризачи Гулистон шаҳрида жойлашган қабристон яқинида тадбиркор М.Д.ни қотиллик аломатлари билан ётган, юз ва бош қисми грим қилинган жасади ва уни вафот этгани сунъий равишда яратилган фото суратини кўрсатгач, буюртмачи тадбиркор Ж.З. Мирзаобод тумани Боғистон маҳалласи ҳудудида унга 4 минг АҚШ долларини берган вақтида ушланган.
Мазкур ҳолат юзасидан Сирдарё вилояти прокуратураси томонидан Ж.З.га нисбатан ЖКнинг 25, 97-моддаси 1-қисми (Қасддан одам ўлдиришга суиқасд қилиш) билан жиноят иши қўзғатилган.
Гумонланувчи Ж.З. процессуал тартибда ушланган. Тергов ҳаракатлари олиб борилмоқда.
