ТОШКЕНТ, 7 сен — Sputnik. Россия бош вазири Михаил Мишустин мамлакат президенти Владимир Путинни ўзининг мураббийи деб ҳисоблайди. Бу ҳақда у “Россия етакчилари” бошқарувчилар танлови тадбиридаги чиқишида маълум қилди.
“Бугун мен учун мураббий – Россия президенти. Мутлақо самимий айтяпман. Бу сиз суткада 24 соат маслаҳатлашишингиз, ишонишингиз мумкин бўлган инсон”, - деди сиёсатчи. Унинг сўзларидан РИА Новости иқтибос келтирган.
Бош вазирнинг таъкидлашича, “балки, мураббий билан тез-тез маслаҳатлашмаслик ҳам мумкин, лекин у аниқ ёнингизда ва аниқ сизни қўллаб-қувватлайди”.
“Шу боис мен учун мураббийлик – бу ҳам касбимдаги, ҳам шахсий ҳаётимдаги менга яқин бўлган инсонлар”, - дея қўшимча қилди Мишустин.
Унинг сўзларига кўра, биринчи мураббийлари ота-онаси, кейин эса мактабдаги ўқитувчилар бўлишган.
Эслатиб ўтамиз, Путин 2020 йил январида Мишустинни Россия ҳукумати раҳбари этиб тайинлади. У бунга қадар Федерал солиқ хизмат раҳбари сифатида ишлаб келаётган эди.
