ТОШКЕНТ, 1 сен — Sputnik. Ёпиқ чегаралар туфайли ўз уйларига қайта олмаган 900 нафардан зиёд Ўзбекистон фуқаролари Самара вилоятидан ватанига поездда жўнаб кетди. Бу ҳақда РИА Новости минтақа ҳукумати матбуот хизматига таянган ҳолда хабар қилмоқда.
Ватанига кетишни режалаштирган Ўзбекистон фуқаролари 15 августдан Кинелга кела бошлаган. Аввалига улар темир йўл вокзалидаги платформада жойлашган, 21 август куни эса минтақа ҳукумати улар учун чодирли лагерь ташкиллаштирган. Вақтинчалик жойлаштириш пункти бошлиғи Глеб Мельниковнинг сўзларига кўра, 28 август ҳолатига кўра Кинелда икки мингга яқин Ўзбекистон фуқароси бўлган, чодирли лагерь фақат 700 кишига мўлжаллангани боис қолганлари вақтинчалик жойлаштириш пункти атрофида жойлашган. Шу билан бирга, уларнинг барчаси озиқ-овқат билан таъминланмоқда.
“922 кишини олиб кетишди. Чегаралар ёпиқ. Ўзбекистон фуқароларидан яшаш жойларида қолишларини сўрашмоқда”, - деган агентлик суҳбатдоши.
Таъкидланишича, у ерда яна Ўзбекистон фуқаролари қолмоқда.
Тошкент мунтазам равишда фуқаролардан рус-қозоқ чегарасида тўпланмаслик ва чартер рейсларни Россияда яшаб турган жойида кутиб туришни сўрамоқда.
