ТОШКЕНТ, 4 авг — Sputnik. Андижон вилоятида ёқтирган қизи учун жанжаллашган йигит бир инсоннинг ҳаётига зомин бўлди. Бу ҳақда ИИВ ҳузуридаги Тергов департаменти хабар қилмоқда.
Маълум бўлишича, 18 ёшли О.Н. ўзининг яхши кўрган қизига гап отганлиги учун 30 ёшли Ж.Ў. билан ўзаро жанжаллашган. 25 июль куни Асака тумани “Қипчоқ” МФЙ ҳудудида О.Н. қўлида бўлган темир бўлаги билан Ж.Ў.нинг бош қисмига уриб, тан жароҳати етказган.
Натижада Ж.Ў. оғир тан жароҳати олиб шифохонага ётқизилган. Кўрсатилган тиббий муолажаларга қарамасдан Ж.Ў. икки кун ўтиб шифохонада вафот этган.
Мазкур ҳолат юзасидан очилган иш Жиноят кодексининг 104-моддаси 3-қисми “д” бандига (жабрланувчининг ўлимига сабаб бўлган қасддан баданга оғир шикаст етказиш) қайта малакаланган.
О.Н. гумон қилинувчи тариқасида жалб қилиниб, процессуал тартибида ушланган.
Ҳозирда тергов ҳаракатлари давом этмоқда.
