ТОШКЕНТ, 18 июн - Sputnik. Ўзбекистонда касалланганлар сони ҳақидаги рақамлар бўрттириб кўрсатилаётгани йўқ. Бу ҳақида Санитария-эпидемиология назорати давлат инспекцияси бошлиғи Нурмат Отабеков АОКАда бўлиб ўтган брифингдан сўнг жавоб қайтарди.
Журналистларнинг, аҳоли орасида гўёки одамларни карантинда ушлаб туриш учун беморлар сони бўрттириб кўрсатилмоқдами, хабарларда эълон қилинаётган беморлар сони ҳақиқийми?, -деган саволига Отабеков қуйидагича жавоб берди:
- Рақамларни бўрттириб кўрсатиш ёки уларни каттароқ рақам қилиб кўрсатиш — ҳеч қачон Ўзбекистондаги соҳа вакилларининг мақсади бўлган эмас. Энг асосийси, бизда касалликни яширишга уриниш йўқ.
Лаборатория текшируви натижасида аниқланган ҳар бир шахс қайси ҳудуддан экани, қайси аҳоли қатламига мансуб экани, у карантин ҳудудида ё хориждан келан фуқаролар орасида қайд этилаётгани тўғрисида тўлиқ ахборотни бир кунда 2 маротаба телевидение орқали оммага етказяпмиз.
Асосий мақсадимиз — уларни хавотирга солиш эмас, уларни хушёрликка чақириш. Касаллик қўзғатувчилари атрофимизда борлигини, ҳар бир эҳтиётсизлик касалликни юқтириб олиш эҳтимолини юзага келтириши мумкинлигини биз қайта-қайта эслатяпмиз.
Дунё статистикасига аҳамият беринг: бир кунда, масалан бугун (15 июнь) жаҳон миқёсида 123 мингта бемор қайд этилди, кеча 140 минг бемор аниқланган.
Албатта, дунё ҳамжамиятидаги рақамларнинг олдида Ўзбекистонда кўрсаткичлар бирмунча паст. Буларнинг барчаси — биз, сизлар билан биргаликда олиб бораётган тарғибот-тушунтириш ишларимиз, қолаверса, шу ишга жалб қилинган соҳа ходимларининг саъй-ҳаракатлари натижаси.
Асосий мақсад эпидемик вазиятни жиловлашга қаратилган. Биз касаллик кенг кўламда аҳолига тарқалиб кетишининг олдини олиш бўйича ҳамма ишларни қиляпмиз. Аҳолига тўғри маълумотни ўз вақтида етказишга ҳаракат қиляпмиз.
