ТОШКЕНТ, 19 мар — Sputnik. Тожикистонда Истанбулдан Тошкентда учиб келган мамлакат фуқаролари қидирилмоқда. Улар ушбу самолётда келган ва кейинчалик коронавирус инфекцияси аниқланган ўзбекистонлик билан мулоқот қилган бўлиши мумкинлиги айтилмоқда.
Sputnik Тожикистон нашри хабарига кўра, бу ҳақда Тожикистон бош прокурори Юсуф Раҳмон республика парламентининг юқори палатаси мажлисида маълум қилган.
Бош прокурорнинг сўзларига кўра, 15 март куни 10 нафар Тожикистон фуқароси Истанбул-Тошкент рейси билан келган. Улардан 6 нафарининг шахси аниқланган ва карантинга олинган.
Ҳозирда қолган 4 нафар фуқарони қидириш ишлари олиб борилмоқда.
Эслатиб ўтамиз, шу йилнинг 15 март куни Истанбул - Тошкент йўналишидаги рейс билан келган Ўзбекистон фуқаросида коронавирус инфекцияси аниқланган эди. Ҳозирда Ўзбекистонда янги коронавирусни юқтириб олганлар сони 23 тага етган. Мамлакатда инфекция тарқалиб кетишининг олдини олиш мақсадида турли чоралар кўрилмоқда. Бунга барча воситалар жалб қилинган.
