ТОШКЕНТ, 27 фев – Sputnik. Андижонда тиббиёт институти талабалари кучли таъсир қилувчи дори воситаларининг ноқонуний савдоси билан шуғулланаётганларида қўлга олинди. Бу ҳақда Бош прокуратура матбуот котиби маълум қилмоқда.
Қайд этилишича, Бош прокуратура ҳузуридаги Департаментнинг Фарғона вилояти бошқармаси томонидан ДХХ ва ИИБ ходимлари билан ҳамкорликда тезкор тадбир ўтказилган.
Унда Андижон давлат тиббиёт институти уч нафар талабалари харидорга жами 1 000 дона кучли таъсир қилувчи “Тропикамид” дорисини 45 млн. сўмга сотаётган вақтларида ушланганлар.
Шу каби ўтказилган яна бир тадбир вақтида фуқаро К.М. ва М.А.лар харидорга жами 2 625 дона “Тропикамид” дорисини 105 млн. сўмга сотаётганликлари аниқланиб, қўлга олинган.
Уларнинг ёнидан жами 8 000 дона “Тропикамид” дори воситалари ашёвий далил сифатида олиб қўйилган.
Ҳозирда мазкур ҳолатлар бўйича ЖКнинг тегишли моддаси билан жиноят ишлари қўзғатилиб, тергов ҳаракатлари ўтказилмоқда.