ТОШКЕНТ, 14 янв - Sputnik. Давлат божхона қўмитаси ижтимоий тармоқларда тарқалган хабарлар юзасидан муносабат билдирди, Қўмитас расмий хабарига асосан.
Эслатиб ўтамиз, 13 январ куни Россия ва Узбекистон шаҳарлари орасида доимий қатнайдиган ҳайдовчилар ҳукумат томонидан жорий этилган янги божхона тўловларидан норози бўлиб, Олий Мажлис биноси олдида тўпланишган эди.
ОАВ ва ижтимоий тармоқларда тарқалган мурожаатномаларида ҳайдовчилар асосан, янги бож ставкаси жорий этилганидан буён ҳар бир вилоятдан бир неча минг киши ишсиз қолганини, ушбу божлар Россияда меҳнат қилаётган мигрантлар учун ҳам қимматга тушаётганини айтиб, президентдан ёрдам сўрашган эди.
Бунга жавобан Божхона қўмитаси, янги қонун қайси ҳолатларда қўлланилишини батафсил тушунтириб берган.
2019 йил 7 ноябрда қабул қилинган “Жисмоний шахслар томонидан шахсий эҳтиёжлари учун товарларни олиб ўтиш тартибини янада такомиллаштириш тўғрисида” ПҚ-4508-сон президент қарорига мувофиқ, 2020 йил 1 январдан бошлаб Ўзбекистон ҳудудига автомобил транспортида ёки пиёда кириб келганда, умумий қиймати 300 АҚШ долларидан ортиқ бўлган юкларнинг ҳар бир килограмидан 3 доллардан ягона бож тўлови ундирилади.
Самолётда кириб келган йўловчилар учун ушбу тўлов юклар қиймати 2000 АҚШ долларидан ошганда, темирйўл транспортида кириб келган йўловчилар учун – 1000 АҚШ долларидан ошганда олинади.
