ТОШКЕНТ, 18 дек — Sputnik. Соғлиқни сақлаш вазирлиги Тошкент метрополитенининг янги қурилаётган Юнусобод йўналиши қурилишида ер ўпирилиши оқибатида рўй берган аварияда жароҳатланганлар йўқлигини маълум қилди.
Қайд этилишича, воқеа жойига зудлик билан тиббиёт ходимларидан иборат тезкор бригадалар жалб қилинган.
“Ҳозирча ҳодиса оқибатида жароҳатланганлар йўқ. Воқеа гувоҳи бўлган 1975 йил туғилган қашқадарёлик Б.М. ушбу ҳолатдан қаттиқ стрессга тушган”, - дейилади хабарда.
Айни пайтда унга Республика шошилинч тиббий ёрдам илмий марказида сифатли тиббий ёрдам кўрсатилмоқда.
Хабарда воқеа жойида қидирув-қутқарув ишлари олиб борилаётгани қўшимча қилинган.
Эслатиб ўтамиз, аввалроқ Тошкент метрополитенининг янги қурилаётган Юнусобод йўналиши қурилишида ер ўпирилиши оқибатида авария содир бўлгани хабар қилинган эди.
