ТОШКЕНТ, 31 окт – Sputnik. Фуқаролик жамиятини ривожлантириш маркази ташкил қилинди. Бу ҳақида Ўзбекистон президентининг 30 октябрь куни имзоланган қарорида айтиб ўтилган.
Қарорда айтилишига кўра ушбу Фуқаролик жамиятини (ФЖ) ривожлантириш Маркази - кучли ва адолатли фуқаролик жамиятини қуриш ҳамда ижтимоий шериклик ва жамоатчилик назорати механизмлари самарадорлигини ошириш мақсадида ташкил қилинган.
Асосий вазифалари
- халқ билан мулоқот ҳолати ва ривожланишини ўрганиш;
- давлат органлари фаолияти очиқлигини тизимли таҳлил қилиш;
- ФЖ ривожлантириш соҳасида амалий тадқиқотлар ташкил этиш;
- ФЖ ривожлантиришнинг миллий моделини такомиллаштириш;
- ФЖ ривожланишининг норматив-ҳуқуқий тартибга солинишини ўрганиш;
- ижтимоий шериклик ва жамоатчилик назоратини амалга оширишни ўрганиш;
- давлат органларининг фуқаролик жамияти институтлари билан самарали ҳамкорлиги механизмларини жорий этиш юзасидан таклифлар ишлаб чиқиш;
- рақобатдош кўппартияли тизимнинг ривожланиш даражасини тизимли таҳлил қилиш,
- ФЖ институтларини ривожлантириш, фуқаролар фаоллигини ошириш;
- ижтимоий-иқтисодий ривожланишда ННТ муаммоларини тизимли ўрганиш ва бошқалар;
Марказга берилган ҳуқуқ ва имтиёзлар
Марказ нодавлат нотижорат ташкилоти шаклидаги юридик шахс ҳисобланади;
Марказ директори - Ўзбекистон президент ҳузуридаги Фуқаролик жамиятини ривожлантириш бўйича маслаҳат кенгаши раҳбари ўринбосари ҳисобланади;
Маркази ва унинг ҳудудий бўлинмаларининг ходимлари умумий сони 115 нафар билан чекланади;
Марказ ходимларининг маошларини белгилашда тариф коэффициентлари икки баравар оширилган миқдорда қўлланилади;
Марказ ходимларни Тошкент шаҳри ва Тошкент вилоятида доимий прописка қилиш ҳуқуқига эга бўлган давлат ташкилотлари рўйхатига киритилади;
Марказни молиялаштириш манбаалари
- Олий Мажлис ҳузуридаги ННТ ва фуқаролик жамиятининг бошқа институтларини қўллаб-қувватлаш жамоат фонди;
- Инновацион ривожланиш вазирлиги грантлари;
- Халқаро молия ва бошқа институтлар, чет эл ташкилотлари грантлари;
- Жисмоний ва юридик шахсларнинг ҳомийлик хайриялари;
Қарор матни билан батафсил Ўзбекистон Республикаси норматив-ҳуқуқий ҳужжатлар расмий базасида танишинг.