ТОШКЕНТ, 10 мар — Sputnik. Ўзбекистон “AirVisual” ҳаво сифатини мониторинг қилиш билан шуғулланувчи халқаро ташкилот томонидан тузилган 2018 йилда энг ифлос ҳавога эга мамлакатлар рейтингида 16-ўринни эгаллади.
Ўзбекистон рейтингда сариқ ранг билан белгиланган. Бу ҳаводаги зарарли моддалар миқдори қониқарли даражада, лекин ифлосланган ҳавога сезгир бўлган кишилар ўз саломатлиги ҳақида қайғуриши кераклигини билдиради.
Қайд этиш жоизки, Қозоғистон 20-ўрин, Украина-49, Россия 58-ўриндан жой олган. Ўзбекистон ва Қозоғистондан ташқари Марказий Осиё мамлакатлари рейтингга киритилмаган.
Жаҳон бўйича энг ифлосланган ҳавога эга давлат сифатида Бангладеш кўрсатилган. Ундан кейинги поғоналардан Покистон ва Ҳиндистон ўрин олган.
Ҳавоси энг тоза мамлакат сифатида Исландия, Финландия, Австралия қайд этилган.
Рейтинг тузувчилар ҳар йили ҳаво ифлосланиши туфайли 7 млн.га яқин киши вафот этиши, шунингдек, бу ҳолат жаҳон иқтисодиётига ҳар йили 225 млрд. долларлик зарар етказишини қайд этишди.
