ТОШКЕНТ, 14 мар — Sputnik. Ушбу йилнинг январь ойида Республика болалар жарроҳлик марказига танасида 16 игна билан оғир аҳволда ётқизилган 11 ойли Азизбек Абдумажидов соғайиб кетди ва уйига жавоб берилди, деб хабар қилмоқда uznews.uz саҳифаси.
Болалар жарроҳлик бўлими шифокори Дониёр Асадуллаев айтишига қараганда, бу тиббиёда камдан-кам учрайдиган ўта нозик жарроҳлик операциясидир. Операциядан сўнг болакай бир неча кун кома ҳолатида ётган. Шифокорлар қўлларидан келган барча амалиётларни бажаришган.
Айни дамда болакай соғайиб ота-онаси билан уйига жўнаб кетган.
"Азизбек — оиламизда ягона фарзанд. Биз уни тўйдан кейин беш йил кутгандик. Ўғлим соғайиб кетди, барчадан миннатдорман. Энди уни бағримга босишим мумкин! Шифокорларга катта раҳмат. Икки ой давомида улар ўз куч ва билимларини аяшмади. Уларнинг ушбу жасоратини ҳеч қачон унутмайман!", — деди болакайнинг онаси Шоҳсанам Болтабоева.
Эслатиб ўтамиз, 9 соат давом этган операция давомида болакайнинг танасидан 13та игна олиб ташланган эди. Қолган игналарга, боланинг соғлигига хавф туғдирмагани учун, ҳозирча тегмасликка қарор қилинган эди.
Фарғона вилояти Тошлоқ тумани прокуратураси ушбу иш юзасидан жиноий иш қўзғатган. Азизбекни операция қилган жарроҳ Акилов Хабибулла Атауллаевич айтишига қараганда болакай ушбу игналарни ўзи ютиб юборганига ишониш жуда қийин, игналар тананинг турли жойларида жойлашгани, улар ўзга киши томонидан суқилгани бўлиши мумкинлигидан далолат беради.
