ТОШКЕНТ, 19 янв — Sputnik. Шавкат Мирзиёев Ҳаким Термизий мақбараси зиёрати чоғда Оқтўбада Ўзбекистон фуқаролари вафот этганидан чуқур қайғуда эканини айтиб, уларнинг яқинларига таъзия билдирди. Марҳумлар ҳақига дуо қилинди, деб хабар қилди Ўзбекистон президенти матбуот хизмати.
Кеча тонгда Актўбе области Ирғиз тумани ҳудудидан ўтувчи «Самара-Чимкент» автомобил йўлининг 1068 кмда Калибой аҳоли яшаш пунктидан 10 км узоқликда йўловчи автобус ёниб кетди.
Setra русумли автобус ҳаракатланаётган вақтида аланга олган. Автобус Қозоғистон жанубидан Россиянинг Қозон шаҳрига йўл олганди. Унда 57 киши бўлган, фақат 5 киши чиқа олган, қолган 52 киши ҳалок бўлган. Айни вақтда автобус ёниб кетиши оқибатида ҳалок бўлган 52 кишидан 32 нафарининг шахси аниқланган. Уларнинг аксар қисми Наманган вилоятидан бўлган.
