ТОШКЕНТ, 15 янв — Sputnik. АҚШ Марказий Осиёдаги мамлакатларнинг бирида "С5+1" форматидаги (Ўзбекистон, Қозоғистон, Қирғизистон, Тожикистон, Туркманистон ташқи ишлар вазирлари ва АҚШ Давлат котиби) учрашув ўтказмоқчи. Бу ҳақда АҚШ Давлат котиби ёрдамчисининг биринчи ўринбосари Элис Уэллс баёнотига таянган ҳолда РИА Новости хабар берган.
"Ушбу формат конструктив ва самарали бўлиб қолмоқда. Аввалги маъмурият томонидан йўлга қўйилган бу формат АҚШ президенти Дональд Трамп томонидан ҳам тўла қўллаб-қувватланмоқда. Давлат котибимиз Рекс Тиллерсон Нью-Йоркда ўз ҳамкасблари билан бу доирада учрашганди. Келгусида Марказий Осиёда шундай учрашув ўтказилади. Бу лойиҳани мустаҳкамлаш учун АҚШ Конгресси 15 миллион доллар маблағ ажратган", — деб таъкидлаган, деган Элис Уэллс телефон орқали ўтказилган брифинг давомида.
Унинг сўзларига кўра, Америка Қўшма Штатлари Марказий Осиё бирлашаётгани ва минтақанинг умумий муаммоларини ҳал қилаётганидан хурсанд.
