ТОШКЕНТ, 22 дек – Sputnik. Ўзбекистон президенти Шавкат Мирзиёев Олий Мажлис Сенати ва Қонунчилик палатаси аъзоларига Мурожаатномасида арзонлаштирилган уйлар қурилиши борасида ҳам фикр билдирди. Бу ҳақда Sputnik мухбири хабар бермоқда.
“Илгари қураётган 6 сотихли уйларимиз анча қиммат эди. Тан олайлик, янги иш ўринлари яратмасдан, аҳолига даромад манбаси яратмасдан, оддий одамларга бундай уйларни сотиб олишга имконият бериш қийин эди. Натижада уйларни асосан бозор директорлари ва бошқалар сотиб олди. Бундан аввалги лойиҳада қурилган уйларнинг 35-40 фоиз бўм-бўш турибди, чунки улар невараю эвараларга олиб қўйилган. Шунинг учун биз оддий аҳоли ҳам сотиб олсин деган ниятда арзонлаштирилган уйларни қуришга қарор қилдик. Шифокорни ҳам, муаллимни ҳам фарзандлари бор, ахир”, деди президент.
Эслатиб ўтамиз, бугун Ўзбекистон тарихида илк бор президент Олий Мажлисга Мурожаатнома йўлламоқда.
