ТОШКЕНТ, 14 дек – Sputnik. Пойтахтнинг Сергели туманида Avtotest ўқув-методик мажмуаси қуриб битказилмоқда, деб хабар берди uz24.uz.
Хабарда айтилишича, ҳар қандай об-ҳаво шароитларига, масалан, ёмғир, қор, яхмалак шароитига мослашган тизимли инновацион автодром мажмуанинг ўзига хос жиҳатидир. Бу ерда ҳайдовчилар турли шароитларда машина бошқариш бўйича билимларни ўзлаштиради. 3 гектар майдонга эга мажмуада, шунингдек, маъмурият ва ўз ичига 14 та аудиторияни олган ўқув биноси, тест синовларини ўтказиш учун компьютер зали ўрин олган.
"Мажмуа ўқитишнинг инновацион усулларини жорий этиш мақсадида замонавий ускуналар билан таъминланади, ҳозирги кунда Ўзбекистонда уларнинг муқобили йўқ", дейилади хабарда.
Мажмуа 2018 йил 1 январдан иш бошлайди. Айни пайтда ўқув курсларига қабуллар Миробод, Чилонзор, Шайхонтоҳур туманларидаги марказларда бўлиб ўтмоқда.
Шунингдек, ҳайдовчиларнинг малака ошириш марказлари Қорақалпоғистон Республикаси ва вилоятларда ҳам очилишга тайёрланяпти.
