ТОШКЕНТ, 6 ноя — Sputnik. Ўзбекистон раҳбари Шавкат Мирзиёев Шароф Рашидов таваллудининг 100 йиллиги олдидан қайта қуриб битказилган мемориал музейда бўлиб, бу ердаги экспозициялар ва яратилган шароитлар билан танишди, деб хабар қилди "Халқ сўзи" нашри.
Шавкат Мирзиёев Шароф Рашидов мемориал музейи фахрий меҳмонлар китобига ўз фикр ва таассуротларини ёзиб қолдирди.
Унда шундай сўзлар бор: "Халқимизнинг буюк фарзанди, атоқли давлат арбоби ва ёзувчи Шароф Рашидов эл-юртимиз учун фидойи раҳбар, бетакрор ва беназир шахс эди…
Ҳар қандай мураккаб шароитда ҳам эл-юртимиз манфаатини ўйлаб яшаган Шароф Рашидовнинг буюк хизматлари халқимиз хотирасида абадий сақланиб қолади.
Бугун Жиззах шаҳрида иш бошлаётган Шароф Рашидов мемориал музейи ана шу эзгу мақсадга хизмат қилади, деб ишонаман".
