ТОШКЕНТ, 21 окт – Sputnik. Андижонда одам савдосининг олди олинди, деб хабар берди вилоят ички ишлар бошқармаси.
Хабарда айтилишича, вилоят ички ишлар бошқармаси ва бошқа ҳуқуқни муҳофаза қилувчи идоралар тезкор ходимлари билан ҳамкорликда олинган тезкор маълумот асосида Асака туманидаги йўл-патруль хизмати масканида тадбир ўтказилди.
Тадбир давомида Олтинкўл туманида яшовчи М.Д. тўхтатилиб, текширилади.
"М.Д. билан ўтказилган суҳбат чоғида, у танишини моддий манфаатдорлик эвазига чет давлатига олиб кетаётганлиги, ойига 2,5-3 минг доллар миқдоридаги ойлик тўланадиган иш ваъда қилганлиги, аслида ундан чет мамлакатда шаҳвоний мақсадларда фойдаланмоқчилиги маълум бўлди", дейилади хабарда.
М.Д. олдиндан олган 200 минг сўм пул ашёвий далил сифатида расмийлаштирилди. Ҳолат юзасидан тергов ҳаракатлари ўтказилмоқда.
