ТОШКЕНТ, 4 окт — Sputnik. Бугун Россия-Ўзбекистон ҳарбий ўқув-машғулотлари доирасида Жиззах вилоятидаги "Фориш" полигонида "Етиб бориш қийин бўлган тоғ шароитида қуролланган бандаларга қарши аксилтеррор операциялар ўтказиш" мавзусида ҳарбий-илмий семинар бўлиб ўтди.
Ўзбекистоннинг Жануби-Ғарбий махсус ҳарбий округи қўмондони ўринбосари подполковник Пўлат Сотволдиев, ҳамда округнинг бўлим ва бошқарма бошлиқлари ҳарбий операция ўтказишда тоғ шароитлари қандай таъсир қилиши ҳақида гапиришди.
Семинардан сўнг икки мамлакат ҳарбийлари иштирокида намойиш-тайёрлов ўқув машғулотлари бўлиб ўтди. Уларда подполковник Зуҳриддин Рахимов бошчилигидаги тоғ-ўқчи бригадалари қуролли ҳужумларни олдини олиш ва улардан ҳимояланиш услубларини намойиш қилишди.
Эслатиб ўтамиз, Россия ва Ўзбекистон ҳарбийлари "Фориш" полигонида 2005 йилда ҳам биргаликда ўқув машғулотлари ўтказишган эди. Бу сафарги тажриба алмашишда Россия Марказий ҳарбий округи Тыва Республикасида жойлашган тоғ-ўқчи бригадалар иштирок этди.
