ТОШКЕНТ, 25 сен — Sputnik. Татаристон президенти Рустам Миннихановнинг Ўзбекистонга ташрифи давомида соғлиқни сақлаш, ахборот технологиялари соҳаларида ҳамкорлик ҳақида ҳужжатлар имзоланди, деб хабар қилмоқда РИА Новости.
Рустам Минниханов 23 сентябрь куни Ўзбекистонга келган эди. ташриф давомида Минниханов Самарқандда бўлиб, Ўзбекистон биринчи президенти Ислом Каримов қабрини зиёрат қилишни режалаштирган.
Шунингдек Татаристон раҳбари Ўзбекистон президенти Шавкат Мирзиёев билан ҳам учраши режалаштирилгани маълум.
"Бизнинг ҳамкорлигимиз даражаси имкониятларимизга тўғри келмайди, авваломбор иқтисодиёт соҳасида", — деди Минниханов, Ўзбекистон ва Татаристон бизнес-форумида сўзга чиқиб.
Минниханов айтишига қараганда, Татаристон Ўзбекистонда электро ва гидроэнергетика объектлари қуриш ва модернизация қилишда, машинасозлик маҳсулотлари еткизиб беришга ҳамда тиббиёт соҳасида алоқаларни ривожлантиришга қизиқиш бор.
"Ва албатта нефт ва газ кимёси — бу сизда ҳам бизда ҳам устувор йўналишлардан биридир", — деди Татаристон раҳбари.
Унинг сўзларига кўра, икки мамлакат орасидаги маҳсулот айрбошлаш ўтган йили бор-йўғи 50 миллион долларни ташкил қилган.
"Биз яқин муддат ичида ушбу ҳажмни икки ёки уч бараварга кўпайтиришга келишиб олдик", — деди ўз навбатида Ўзбекистон бош вазир ўринбосари Гуламжон Ибрагимов.
Унинг сўзларига кўра, ушбу мақсадга эришишда Татьнефть, КамАЗ, КМПО ва "Казхимфарм" компанияларининг Ўзбекистон бозорига келиши ёрдам беради.
Бўлиб ўтган бизнес форумда, шунингдек соғлиқни сақлаш, туризм, ахборот технологиялари соҳаларида ҳам шартномалар имзоланди.
Хусусан, тиббиёт соҳасида Ўзбекистонда симуляцион ўқув маркази ташкил қилиш, шунингдек Ўзфармсаноат ва "Завод имени Серго" ишлаб чиқариш уюшмаси орасида шартномалар имзоланди. Ахборот технологиялари соҳасида Ўзбекистон Ахборот ва коммуникациялар вазирлиги ва Татаристон ахборотлаштириш вазирлиги орасида шартномалар имзоланди.
Ташрифи давомида, Минниханов Ўзбекистонда яшаётган татарлар диаспораси билан ҳам учрашди. Президент Алишер Навоий номли опера ва балет Катта театрида Татаристон санъат арбоблари концерт дастурини томоша қилди.
