ТОШКЕНТ, 21 сен — Sputnik. Ўзбекистон президенти Шавкат Мирзиёев 20 сентябрь куни Нью-Йоркда Грузия Бош вазири Георгий Квирикашвилини қабул қилди, президент матбуот хизмати хабарига асосан.
Хабарда айтилишича, 2017 йил 8 ойида Ўзбекистон ва Грузия ўртасида товар айирбошлаш 20 %га ошган.
Томонлар товар айирбошлаш ҳажмини янада ошириш ва номенклатурасини кенгайтириш, савдо-саноат палаталари ўртасидаги алоқаларни фаоллаштириш, савдо уйлари ташкил этиш ва қўшма кўргазмалар ўтказиш масалаларини муҳокама қилдилар.
"Ўзбекистон Грузияга автомобиллар, тўқимачилик ва электр техникаси маҳсулотлари экспорт қилиш, Грузия йўллари орқали жаҳон бозорига чиқишдан манфаатдор. Грузия мамлакатимиздан мева-сабзавотлар харид қилиши, виночилик соҳасида қўшма корхоналар ташкил этиши мумкин", — деб ёзилган хабарда.
Эслатиб ўтамиз, жорий йилнинг май ойида Тошкентда Грузия кино кунлари ўтказилган эди. Август ойида эса Тбилисида илк бор Ўзбекистон маданият кунлари бўлиб ўтди.
